ARHIVA GLAVNIH VIJESTI

Javna ustanova Ratkovićeve večeri poezije u saradnji sa Nevladinim udruženjem Klub kulture organizovala je sinoć promociju knjige „Devet jezika ćutnje“ Miroslava Jovanovića Timotijeva u kući Rista Ratkovića. O ovoj knjizi, osim autora, govorili su Milica M. Vukmanović i Rafet Mulić, dok je stihove kazivao Radoman Čečović.  

Knjiga „Devet jezika ćutnje“ nedavno je objavljena u izdanju JU Ratkovićeve večeri poezije i predstavlja krunu 50-godišnjeg književnog rada Miroslava Jovanovića Timotijeva. Timotijev kaže da da poeziju pronalazi između nadmoći jezika i nemoći govora.

- To je ta kreativna ćutnja i kada ona progovori ja znam da sam pjesnik. Ćutnja je stanište poezije i uvijek sam u prilici da smatram da je ćutnja puno bogatija u tom nekom mogućem angažovanju pisca. U njoj pronalazim neke nove metafizičke vidike i zato je moja nova knjiga, cijela o ćutnji, kazao je Timotijev, koji ističe da pored Nikišića u kojem je rođen, Bara u kojem živi i stvara i Bijelo Polje za njega ima posebnu vrijednost, prvenstveno zbog međunarodne manifestacije Ratkovićeve večeri poezije.

- Bijelo Polje je grad koji je iznjedrio velike pjesnike, manifestaciju  Ratkovićeve večeri poezije, koja mi je u tom poetskom smisli otvorila vrata svijeta, odnosno zahvaljujući njoj imam osjećaj kao da je cijeli svijet književnosti došao kod mene kući, kazao je Timotijev.

Miroslav Jovanović Timotijev prisutan je na književnoj sceni pedeset godina, prvenstveno kao pjesnik, ali je zapažen i kao esejista, kolumnista i književni kritičar. Do sada je objavio osam knjiga pjesama za odrasle i pet za djecu. Dobitnik je mnogih književnih nagrada i priznanja, prevođen na nekoliko stranih jezika i zastupljen u pjesničkim izborima i antologijama.